Miçiqan
Universitetinin alimləri belə bir qənaətə gəliblər ki, şokoladın cazibə
qüvvəsinin sirri onun insan beyninə tiryək kimi təsir göstərməsindədir.
İşlərinin əsas müddəaları bu gün Britaniyanın "Deyli teleqraf”
qəzetində dərc olunmuş tədqiqatçılar eksperimentlər zamanı müəyyən
etmişlər ki, şokoladdan istifadə orqanizmin təbii kimyəvi enkefalin
birləşməsi hasilatının artmasına səbəb olur. Bu neyropeptidlər
morfinəbənzər təsirə malikdir və insanda eyforiya vəziyyəti yaradan
endorfinlər qrupuna daxildir. Tədqiqatın rəhbəri professor
Aleksandra Di Feliçiantonio deyib: "Biz müəyyən etmişik ki, şokoladın
beyinə təsir mexanizmi tiryəkin və ona bənzər vasitələrin təsiri
kimidir. İnsan üçün şokoladın növbəti hissəsini yemək istəyini boğmaq
çox çətindir”. Amerika alimləri şirniyyatı sevənləri narkomanlar
üçün hazırlanmış metodikalarla müalicə etməyi məsləhət görmürlər. Amma
artıq çəki təhlükəsi yaradan şirniyyata meyilliliyi cilovlamaq üçün
iradəli olmağa çağırırlar.
