 |
Tərkibi:
xəmir:
2 kq un
1 ç.q. şəkər tozu
1 l süd
4 yumurtanın sarısı
70-100 q xama
400 q kərə yağı
2 ç.q. maya (1 kq-a 1 ç.q.)
2 paçka vanil
1 çimdik duz
iç:
1 kq təmizlənib qozçəkəndən keçirilmiş badam (qoz, fındıq)
1 kq şəkər tozu
vanil
hil
Öncə
badamı təmizləmək lazımdır. Qaynar suya badamları hissə-hissə töküb
ocağın üstə qoyun, 3-4 dəqiqəyə qabığı asanlıqla çıxacaq, kəfkirlə
çıxarıb təmizləyin. Sonra təmiz dəsmalın üstünə yığın, suyu çəkilsin.
Yaxşı olar ki, badam (qoz, fındıq) bir neçə gün əvvəl təmizlənib
qurudulsun. Sobada da qurutmaq olar.
Badamı qozçəkən maşından keçirib şəkər tozu, vanil, hil vurun, qarışdırın.
Xəmir:
unu ələyin, vanil və duz əlavə edin. Təxminən 1-1,5 st. südü xəmiri
ətləmək üçün saxlayın. Qalanını azca isidin, içinə maya və şəkər tozu
əlavə edin.
Unu təpələyib ortasında çala açın, 4 yumurtanın
sarısını içinə qırın, azca əridilmiş yağı, xamanı, südlə mayanın
qarışığını da əlavə edib yoğurmağa başlayın. Şəkərbura xəmiri azca bərk
olmalıdır, uzun müddət yoğurmaq lazım gələcək. Arada əlinizi ayırdığınız
südə batırıb xəmiri ətləyin.
Xəmiri yarım saat saxlayın.
3-3,5
sm diametrli kündələr tutun (25-30 ədəd), sellofan torbaya yanaşı
yığın. Kündələməyi bitirdikdən sonra bunları yayıb üst-üstə, yenə də
sellofan torbanın içinə yığın. Xəmir artıq qalıbsa, soyuducuya qoyun.
Hər
şəkərbura üçün bir x.q. iç kifayət edər. Şəkərburaların qırağını büküb
üstünü naxışlayandan sonra soyuq siniyə düzün. Üzərini nazik təmiz iynə
ilə bir neçə yerdən deşə bilərsiniz, o zaman şəkərburaların kənarları
açılmır.
160-180 dərəcə qızdırılmış sobada 10-15 dəqiqə bişirin. Diqqət edin ki, üstü qızarmasın. Həm də çiy qalmasın.
Nuş olsun!
|  |
